റോം: വിശ്വാസത്തിന്റെയും പാരമ്പര്യത്തിന്റെയും ആഗോള ഐക്യത്തിന്റെയും പുതിയ അധ്യായം രചിച്ചുകൊണ്ട് സീറോ മലബാര്‍ സഭയുടെ ഔദ്യോഗിക അല്‍മായ സംഘടനയായ കത്തോലിക്ക കോണ്‍ഗ്രസിന്റെ ആഗോള സമ്മേളനത്തിന് ഇറ്റാലിയന്‍ തലസ്ഥാനമായ റോമില്‍ പ്രൗഢോജ്ജ്വല തുടക്കം.
ഒക്ടോബര്‍ 19 മുതല്‍ 23 വരെ റോമിലെ മാറ്റര്‍ എക്ളേസിയേ (Mater Ecclesiae) യില്‍ നടക്കുന്ന സമ്മേളനത്തില്‍ ലോകത്തിന്റെ വിവിധ ഭൂഖണ്ഡങ്ങളിലെ 40 രാജ്യങ്ങളില്‍നിന്നുള്ള പ്രതിനിധികളാണ് പങ്കെടുക്കുന്നത്. ലിയോ പതിനാലാമന്‍ മാര്‍പാപ്പയുടെ ആശീര്‍വാദം തേടിയും ആഗോള കത്തോലിക്കാ സമൂഹത്തിന്റെ ഐക്യസന്ദേശം ഉയര്‍ത്തിപ്പിടിച്ചുമാണ് സമ്മേളനം സംഘടിപ്പിച്ചിരിക്കുന്നത്.
സഭാ മേലധ്യക്ഷന്മാരുടെയും പ്രമുഖരുടെയും സാന്നിധ്യത്തില്‍ ഉദ്ഘാടനം നടന്നു. ഒക്ടോബര്‍ 19~ന് നടന്ന ഉദ്ഘാടന സമ്മേളനം സഭാനേതൃത്വത്തിന്റെയും അല്‍മായ പ്രതിനിധികളുടെയും സജീവ സാന്നിധ്യംകൊണ്ട് ശ്രദ്ധേയമായി.സീറോ മലബാര്‍ സഭയുടെ മേജര്‍ ആര്‍ച്ച് ബിഷപ്പ് മാര്‍ റാഫേല്‍ തട്ടില്‍, കത്തോലിക്ക കോണ്‍ഗ്രസ് ബിഷപ്പ് ലെഗേറ്റ് മാര്‍ റെമീജിയൂസ് ഇഞ്ചനാനിയില്‍, ഗള്‍ഫ് രാജ്യങ്ങളിലെ അപ്പസ്തോലിക വിസിറ്റേറ്റര്‍ മോണ്‍സിഞ്ഞോര്‍ ജോളി വടക്കന്‍ എന്നിവരുള്‍പ്പെടെയുള്ള സഭാ മേലധ്യക്ഷന്മാരുടെ സാന്നിധ്യം സമ്മേളനത്തിന് ആത്മീയ പ്രാധാന്യം പകര്‍ന്നു.
കത്തോലിക്ക കോണ്‍ഗ്രസ് ഗ്ളോബല്‍ പ്രസിഡന്റ് പ്രൊഫ. രാജീവ് കൊച്ചുപറമ്പില്‍, ഗ്ളോബല്‍ ഡയറക്ടര്‍ റവ. ഫാ. ഡോ. ഫിലിപ്പ് കവിയില്‍, ഗ്ളോബല്‍ ജനറല്‍ സെക്രട്ടറി ഡോ. ജോസുകുട്ടി ജെ. ഒഴുകയില്‍, ജനറല്‍ കണ്‍വീനര്‍ ബെന്നി പുളിക്കക്കര തുടങ്ങിയ സംഘടനാ നേതാക്കളും സമ്മേളനത്തിന് നേതൃത്വം നല്‍കി.
കേരളത്തില്‍നിന്നുള്ള ജനപ്രതിനിധികളായ മോന്‍സ് ജോസഫ്, അപ്പു ജോണ്‍ എന്നിവരുള്‍പ്പെടെ സാമൂഹിക, സാംസ്കാരിക, പൊതുപ്രവര്‍ത്തന മേഖലകളിലെ പ്രമുഖ വ്യക്തിത്വങ്ങളും സമ്മേളനത്തില്‍ സന്നിഹിതരായിരുന്നു.ഉദ്ഘാടന സമ്മേളനത്തോടനുബന്ധിച്ച് വൈകുന്നേരം വര്‍ണ്ണാഭമായ സാംസ്കാരിക പരിപാടികളും അരങ്ങേറി. ലോകത്തിന്റെ വിവിധ ഭാഗങ്ങളില്‍ നിന്നുള്ള പ്രവാസി മലയാളികളുടെ സജീവ പങ്കാളിത്തം ചടങ്ങിന് മാറ്റുകൂട്ടി. ജര്‍മനിയില്‍ നിന്ന് ജോളി തടത്തില്‍, മേഴ്സി തടത്തില്‍, അമേരിക്കയിലെ ന്യൂയോര്‍ക്കില്‍ നിന്നും ചിക്കാഗോ രൂപത പാസ്റററല്‍ കൗണ്‍സില്‍ സെക്രട്ടറിയുമായ ഷോളി കുമ്പിളുവേലിയുള്‍പ്പെടെയുള്ള പ്രമുഖര്‍ സംബന്ധിച്ചു. കൂടാതെ റോമിലെ സാമൂഹ്യ സാംസ്കാരിക സംഘടന പ്രവര്‍ത്തകനും മാധ്യമ പ്രവര്‍ത്തകനുമായ പ്രൊഫ. ജോസ് ഫിലിപ്പ് വട്ടക്കോട്ടയിലും സമ്മേളനത്തില്‍ സജീവമായി പങ്കെടുത്ത് സാന്നിധ്യമറിയിച്ചു.
ഒരു നൂറ്റാണ്ടിന്റെ പാരമ്പര്യവുമായി ആഗോള വേദിയിലേക്ക്.
1918~ല്‍ കേരള കത്തോലിക്കാ മഹാജനസഭയായി ആരംഭിച്ച പ്രസ്ഥാനം പിന്നീട് കത്തോലിക്ക കോണ്‍ഗ്രസ് എന്ന പേരില്‍ വളര്‍ന്ന് സീറോ മലബാര്‍ സഭയുടെ അല്‍മായ സമൂഹത്തിന്റെ പ്രധാന സംഘടനയായി മാറുകയായിരുന്നു.
ഒരു നൂറ്റാണ്ടിലേറെ നീളുന്ന ചരിത്രപാരമ്പര്യമുള്ള സംഘടന ഇന്ന് കേരളത്തിന്റെ അതിര്‍ത്തികള്‍ കടന്ന് വിവിധ ഭൂഖണ്ഡങ്ങളിലെ വിശ്വാസികളെ ബന്ധിപ്പിക്കുന്ന ആഗോള കൂട്ടായ്മയായി വളര്‍ന്നിരിക്കുന്നു.
തൊഴില്‍, വിദ്യാഭ്യാസം, സംരംഭകത്വം, സാമൂഹിക സേവനം തുടങ്ങിയ മേഖലകളില്‍ ലോകത്തിന്റെ വിവിധ ഭാഗങ്ങളില്‍ പ്രവര്‍ത്തിക്കുന്ന സീറോ മലബാര്‍ വിശ്വാസികളെ ഒരുമിപ്പിക്കുന്നതിലൂടെ ആഗോളതലത്തിലുള്ള പരസ്പര സഹകരണത്തിനും പുതിയ സാധ്യതകളാണ് സമ്മേളനം തുറന്നിടുന്നത്.
ലോകം ചുറ്റിയ പതാക പ്രയാണത്തിന് റോമില്‍ സമാപനം.
സമ്മേളനത്തിന് മുന്നോടിയായി വിവിധ രാജ്യങ്ങളിലൂടെ നടത്തിയ പതാക പ്രയാണം ഒക്ടോബര്‍ 19~ന് റോമില്‍ പതാക ഉയര്‍ത്തിയതോടെ സമാപിച്ചു.
വിവിധ രാജ്യങ്ങളിലെ കത്തോലിക്ക കോണ്‍ഗ്രസ് ഘടകങ്ങളെ ഒരേ ലക്ഷ്യത്തിലേക്ക് നയിച്ച പതാക പ്രയാണം സംഘടനയുടെ ആഗോള ഐക്യത്തിന്റെയും വിശ്വാസപാരമ്പര്യത്തിന്റെയും പ്രതീകമായി മാറി.ഭൂമിശാസ്ത്രപരമായ അകലങ്ങള്‍ക്കപ്പുറം വിശ്വാസത്തിലും മൂല്യങ്ങളിലും ഒന്നിച്ചുനില്‍ക്കുന്ന സമൂഹത്തിന്റെ ശക്തമായ സന്ദേശമാണ് ഈ പ്രയാണത്തിലൂടെ ഉയര്‍ന്നത്.
വിശ്വാസം, കുടുംബം, യുവജനങ്ങള്‍; ചര്‍ച്ചകളില്‍ സമകാലിക വെല്ലുവിളികള്‍.
ആഗോളവല്‍ക്കരണത്തിന്റെയും അതിവേഗ സാമൂഹിക മാറ്റങ്ങളുടെയും പശ്ചാത്തലത്തില്‍ സീറോ മലബാര്‍ സമൂഹം നേരിടുന്ന വെല്ലുവിളികളും ഭാവിസാധ്യതകളുമാണ് സമ്മേളനത്തിലെ പ്രധാന ചിന്താവിഷയങ്ങള്‍.ലോകമെമ്പാടുമുള്ള സീറോ മലബാര്‍ വിശ്വാസികളുടെ ഐക്യവും സഹകരണവും ശക്തിപ്പെടുത്തുക, പ്രവാസി കുടുംബങ്ങള്‍ നേരിടുന്ന സാമൂഹികവും സാംസ്കാരികവുമായ വെല്ലുവിളികള്‍ വിലയിരുത്തുക, യുവജനങ്ങളെയും പുതിയ തലമുറയെയും സഭയുമായി കൂടുതല്‍ അടുപ്പിക്കുക തുടങ്ങിയ വിഷയങ്ങള്‍ ചര്‍ച്ചകളില്‍ പ്രധാന സ്ഥാനം നേടി.
വിശ്വാസവും സഭാപാരമ്പര്യവും സംരക്ഷിക്കുന്നതിനൊപ്പം മാറുന്ന ലോകസാഹചര്യങ്ങളോട് എങ്ങനെ ക്രിയാത്മകമായി പ്രതികരിക്കാമെന്നതും ചര്‍ച്ചാവിഷയമായി.ആഗോള ബിസിനസ് നെറ്റ്വര്‍ക്കിങ്, സംരംഭകത്വം, പ്രൊഫഷണല്‍ സഹകരണം, വിവിധ രാജ്യങ്ങളിലെ അല്‍മായരുടെ പ്രാതിനിധ്യം, നേതൃത്വപങ്കാളിത്തം എന്നിവയ്ക്കും സമ്മേളനം പ്രാധാന്യം നല്‍കുന്നു.പുതിയ തലമുറയ്ക്ക് വിശ്വാസപാരമ്പര്യം കൈമാറുന്നതിനൊപ്പം അവര്‍ ജീവിക്കുന്ന രാജ്യങ്ങളിലെ സാമൂഹിക യാഥാര്‍ഥ്യങ്ങളുമായി സമന്വയം പുലര്‍ത്തേണ്ടതിന്റെ ആവശ്യകതയും സമ്മേളനം മുന്നോട്ടുവയ്ക്കുന്നു.
പഠനവും സംവാദവും കൂട്ടായ ചിന്തകളും നിറഞ്ഞ ദിനങ്ങള്‍
വിവിധ വിഷയങ്ങളിലുള്ള പഠനക്ളാസുകള്‍, ആശയസംവാദങ്ങള്‍, ചര്‍ച്ചാവേദികള്‍, നയരൂപീകരണവുമായി ബന്ധപ്പെട്ട സെഷനുകള്‍ എന്നിവ സമ്മേളനത്തെ സജീവമാക്കുന്നു.വിവിധ രാജ്യങ്ങളിലെ സാമൂഹിക സാഹചര്യങ്ങളും പ്രവാസി അനുഭവങ്ങളും പങ്കുവയ്ക്കുന്നതിനും പരസ്പരം പഠിക്കുന്നതിനും സമ്മേളനം പ്രതിനിധികള്‍ക്ക് അവസരമൊരുക്കുന്നു.വിശ്വാസപരമായ കൂട്ടായ്മയ്ക്കപ്പുറം സാമൂഹിക ഉത്തരവാദിത്വവും സാംസ്കാരിക സ്വത്വവും പുതിയ തലമുറയുടെ ഭാവിയും ചര്‍ച്ച ചെയ്യുന്ന വേദിയായി സമ്മേളനം ശ്രദ്ധേയമാകുന്നു.
മാര്‍പാപ്പയുടെ ജനറല്‍ ഓഡിയന്‍സില്‍ പങ്കെടുക്കാന്‍ പ്രതിനിധികള്‍
സമ്മേളനത്തിലെ ഏറ്റവും ശ്രദ്ധേയമായ പരിപാടികളിലൊന്നായി ഒക്ടോബര്‍ 21~ന് വത്തിക്കാനില്‍ നടക്കുന്ന ലിയോ പതിനാലാമന്‍ മാര്‍പാപ്പയുടെ ജനറല്‍ ഓഡിയന്‍സില്‍ പ്രതിനിധികള്‍ പങ്കെടുത്തു. ആഗോള കത്തോലിക്കാ സഭയുടെ കേന്ദ്രമായ വത്തിക്കാനില്‍ വിവിധ രാജ്യങ്ങളില്‍നിന്നുള്ള സീറോ മലബാര്‍ പ്രതിനിധികള്‍ ഒരുമിച്ച് പങ്കെടുക്കുന്നത് സമ്മേളനത്തിന് പ്രത്യേക ആത്മീയ പ്രാധാന്യം നല്‍കുന്നു.
വിശ്വാസത്തിന്റെ ആഗോള കൂട്ടായ്മയില്‍ സീറോ മലബാര്‍ അല്‍മായ സമൂഹത്തിന്റെ സാന്നിധ്യം അടയാളപ്പെടുത്തുന്ന അവസരമായാണ് ഈ പങ്കാളിത്തത്തെ പ്രതിനിധികള്‍ കാണുന്നത്. അതേസമയം സംഘടന പ്രതിനിധികളുമായി ഒക്ടോബര്‍ 22 നു മാര്പാപ്പായുമായി നേരിട്ട് നടത്താനിരുന്ന കൂടിക്കാഴ്ച മാര്‍പാപ്പയുടെ അനാരോഗ്യം മൂലം റദ്ദാക്കാണ്ടിവന്നു.
സംഘാടക മികവിന് പ്രശംസകള്‍
വിവിധ ഭൂഖണ്ഡങ്ങളില്‍നിന്നുള്ള പ്രതിനിധികളെ റോമില്‍ ഒരുമിപ്പിച്ച് വിപുലമായ പരിപാടികള്‍ ചിട്ടയോടെ സംഘടിപ്പിച്ച കത്തോലിക്ക കോണ്‍ഗ്രസിന്റെ സംഘാടക മികവും സമ്മേളനത്തില്‍ ശ്രദ്ധേയമായി.
പരിപാടികളുടെ ആസൂത്രണം, പ്രതിനിധികളുടെ ഏകോപനം, വിവിധ രാജ്യങ്ങളിലെ സംഘടനാ ഘടകങ്ങളുടെ സഹകരണം എന്നിവയ്ക്ക് പങ്കെടുത്തവരില്‍നിന്ന് പ്രശംസ ലഭിച്ചു.വിശ്വാസപരമായ ലക്ഷ്യബോധവും സംഘടനാപരമായ അച്ചടക്കവും കൂട്ടായ പ്രവര്‍ത്തനവും ഒരുമിച്ചപ്പോള്‍ അന്താരാഷ്ട്ര സമ്മേളനം വിജയകരമായി മുന്നോട്ടുകൊണ്ടുപോകാന്‍ കഴിയുമെന്നതിന്റെ ഉദാഹരണമായി റോമിലെ ഈ സംഗമം മാറുകയാണ്.
റോമില്‍നിന്ന് ലോകത്തേക്ക് ഐക്യത്തിന്റെ സന്ദേശം
ലോകത്തിന്റെ വിവിധ ഭാഗങ്ങളില്‍ ജീവിക്കുന്ന സീറോ മലബാര്‍ വിശ്വാസികള്‍ക്ക് തങ്ങളുടെ ആത്മീയവും സാംസ്കാരികവുമായ വേരുകളുമായുള്ള ബന്ധം കൂടുതല്‍ ശക്തിപ്പെടുത്താനുള്ള അവസരമാണ് ഈ സമ്മേളനം.ഒരു നൂറ്റാണ്ടിലേറെ നീളുന്ന സംഘടനാപാരമ്പര്യത്തില്‍നിന്ന് ഊര്‍ജം ഉള്‍ക്കൊണ്ട് പുതിയ തലമുറയുടെ പ്രതീക്ഷകളെയും ആധുനിക ലോകത്തിന്റെ വെല്ലുവിളികളെയും അഭിമുഖീകരിക്കാനുള്ള കൂട്ടായ ശ്രമമായും സമ്മേളനം വിലയിരുത്തപ്പെടുന്നു.വിശ്വാസത്തില്‍ ഐക്യപ്പെടുക, പാരമ്പര്യത്തില്‍ അഭിമാനിക്കുക, സഹകരണത്തിലൂടെ ഭാവി പടുത്തുയര്‍ത്തുക എന്ന സന്ദേശമാണ് റോമിലെ കത്തോലിക്ക കോണ്‍ഗ്രസ് ആഗോള സംഗമം ലോകത്തിനു മുന്നില്‍ അവതരിപ്പിക്കുന്നത്.
ഒക്ടോബര്‍ 23 വരെ തുടരുന്ന സമ്മേളനം സീറോ മലബാര്‍ അല്‍മായ സമൂഹത്തിന്റെ ആഗോള പ്രവര്‍ത്തനങ്ങള്‍ക്ക് പുതിയ ദിശാബോധം നല്‍കുമെന്ന പ്രതീക്ഷയിലാണ് പ്രതിനിധികള്‍.
Comments: